Театр инсонларни маънавий тарбиялашга, уларнинг билим ва маданиятини бойитишга, ўзаро меҳр-оқибат, ҳурмат ва дўстлик муносабатларини ривожлантиришга хизмат қиладиган маскандир. 
 
Халқимиз бежизга “Театр — ибратхонадир” дейишмайди, чунки театр – муҳим тарбия маскани. Катта саҳналарда намойиш этилаётган спектакллар ёш авлодни бой меросимиз, умуминсоний қадриятларни асраб-авайлашга, буюк аждодларимизга муносиб бўлишга даъват этади.

 
Олий ва ўрта махсус таълим вазирлигининг 2018 йил 17 февралдаги “Олий таълим муассасаларида “Талабалар театр студиялари” фестивалини ўтказиш тўғрисида”ги 160-сонли буйруғи, “Ёшлар -  келажак бунёдкори!” шиори остида “Ёшлар фестиваллари” доирасида ўтказиладиган олий таълим муассасалари талабалар театр студиялари фестивалини ташкил этиш ва ўтказиш юзасидан Республика ташкилий қўмитасининг баёнига асосан барча олий таълим даргоҳларида талабалар театр-студиялари ташкил этилиб, улар томонидан саҳналаштирилган асарлар ёшлар маънавиятини бойитиш, уларни саҳна санъатининг мумтоз намуналари билан яқиндан таништириш, ижодий фикрлаш қобилиятини ўстиришда муҳим омил бўлмоқда. Студияларга театр санъатига меҳр қўйган иқтидорли йигит-қизлар жалб этилиб, улар миллий ва жаҳон адабиёти асарларини саҳнада ижро этишмоқда. 

 
2018 йил 16 апрель куни Гулистон шаҳрида мазкур фестивалнинг иккинчи саралаш босқичи ўтказилди. Фестивалда Жиззах Политехника институтининг “Ибрат”, Жиззах Давлат педагогика институтининг “Истеъдод” ва Гулистон давлат университетининг “Гулистон гулдастаси” театр студиялари ўз спектакллари билан иштирок этди.

 
Ҳакамлар Ҳайъатининг қарорига асосан  Жиззах Политехника институтининг “Ибрат” театр студияси ғолиб деб топилди ва фестивалнинг ҳудудий босқичига йўлланма берилди.