Kompyuter va ofislarda ishlovchi operator O‘zbekiston Respublikasi Prezidenti Shavkat Mirziyoyev raisligida 3-sentabr kuni «Kambag‘allikni qisqartirish va aholi daromadlarini oshirish bo‘yicha ishlarni yangi bosqichga olib chiqish masalalari» yuzasidan o‘tkazilgan videoselektor yig‘ilishida belgilangan vazifalar ijrosini ta’minlash maqsadida Guliston davlat universiteti rektorining «Kasbga o‘qitish markazlarini tashkil etish to‘g‘risida»gi buyrug‘i qabul qilingan.Mazkur buyruq ijrosini ta’minlash doirasida Axborot texnologiyalari va fizika-matematika fakultetida kam ta’minlangan oilalar a’zolari hamda ishsiz yoshlarning zamonaviy kasbiy bilim va amaliy ko‘nikmalarini shakllantirish, ularning axborot-kommunikatsiya texnologiyalari sohasidagi savodxonligini oshirish hamda bandligini ta’minlashga ko‘maklashish maqsadida kasbga o‘qitish markazi faoliyatini tashkil etish ishlari yo‘lga qo‘yilgan.Fakultetda tashkil etilgan kasbga o‘qitish markazi faoliyati doirasida «Kompyuter va ofislarda ishlovchi operator» kasbi bo‘yicha o‘quv dasturi ishlab chiqilgan. Mazkur dastur tinglovchilarning zamonaviy kompyuter texnologiyalaridan foydalanish, ofis dasturlarida ishlash, elektron hujjatlarni shakllantirish va qayta ishlash, ma’lumotlarni elektron jadvallarda tahlil qilish hamda internet resurslaridan samarali foydalanish bo‘yicha kasbiy kompetensiyalarini rivojlantirishga yo‘naltirilgan.

O‘quv dasturiga muvofiq mashg‘ulotlar ikki oy muddat davomida, haftaning dushanba, chorshanba va juma kunlari soat 17:30 dan 19:00 ga qadar tashkil etilishi belgilangan. Umumiy o‘quv yuklamasi 48 akademik soatni tashkil etadi. Mashg‘ulotlarning nazariy va amaliy uyg‘unlikda olib borilishi tinglovchilarning olgan bilimlarini amaliy faoliyatda qo‘llash imkoniyatlarini kengaytirishga xizmat qiladi.O‘quv mashg‘ulotlari mazmunida Microsoft Word, Microsoft Excel, Microsoft PowerPoint dasturlari, Windows operatsion tizimi, internet va elektron pochta xizmatlari, Google Drive va OneDrive bulutli texnologiyalari hamda elektron ish yuritish vositalaridan foydalanish masalalari qamrab olingan.

Shuningdek, tinglovchilarda elektron hujjatlar tayyorlash, jadvallar bilan ishlash, taqdimotlar yaratish, ma’lumotlarni saqlash va almashish hamda raqamli xavfsizlik qoidalariga rioya qilish bo‘yicha amaliy ko‘nikmalarni shakllantirishga alohida e’tibor qaratilgan.Buyruqning tegishli bandlari ijrosi yuzasidan kasbga o‘qitish markazi faoliyatini samarali tashkil etish, mashg‘ulotlarni tasdiqlangan jadval asosida olib borish, o‘quv jarayonini zarur shart-sharoitlar bilan ta’minlash hamda professor-o‘qituvchilar tomonidan o‘quv dasturida belgilangan mavzularning sifatli o‘zlashtirilishini ta’minlash masalalari ustuvor vazifalar sifatida belgilangan.

 O‘quv kursining yakuniy bosqichida tinglovchilarning egallagan bilim va amaliy ko‘nikmalarini baholash, ularning mustaqil ravishda kompyuter va ofis dasturlarida ishlash kompetensiyalarini aniqlash nazarda tutilgan. Dastur talablarini muvaffaqiyatli o‘zlashtirgan tinglovchilarga belgilangan tartibda universitet sertifikatlarini berish ko‘zda tutilgan.

Guliston davlat universiteti rektorining «Kasbga o‘qitish markazlarini tashkil etish to‘g‘risida»gi buyrug‘i ijrosi doirasida Axborot texnologiyalari va fizika-matematika fakultetida kasbga o‘qitish yo‘nalishida tegishli tashkiliy va o‘quv-uslubiy ishlar yo‘lga qo‘yilgan. Mazkur tashabbus aholining ijtimoiy ehtiyojmand qatlamlari, xususan, kam ta’minlangan oilalar a’zolari va ishsiz yoshlarning kasbiy tayyorgarligini oshirish, raqamli savodxonligini rivojlantirish hamda ularning mehnat bozorida munosib o‘rin egallashlariga ko‘maklashishga qaratilgan.

Поделиться в социальных сетях