Guliston davlat universiteti Madaniyat saroyida elimizning ardoqli shoiri, O‘zbekiston, Qozig‘iston, Tojikiston yozuvchilar uyushmasi a’zosi Muhammad Ismoilning “Muhabbatning vatani” kitobi taqdimoti bo‘lib o‘tdi.

Ushbu tadbirda Sirdaryo viloyati hokimining o‘rinbosari Otabek Nosirov, Guliston davlat universiteti rektori Muhsin Xodjiyev, universitet professor-o‘qituvchilaridan Ravshanbek Mahmudov, Obidaxon Fayzullayeva, Ixtiyor Ermatov, talabalar, shu bilan birga vohamiz ijodkorlaridan Muhammadali Ahmad, To‘lqin Ahmadaliev, Holida Pardaboyeva, Alisher Nur, Rustam Emin,  Lola Nishonova bilan bir qatorda tarix fanlari doktori, Turon Fanlar akademiyasi akademigi va Prezidenti, o‘nlab Xalqaro orden va mukofotlar sovrindori, bugungi kunning eng buyuk tarixchilaridan biri, donishmand inson Haydarbek Nazirbekovich Bobobekov, davrimizning eng zabardast va eng mashhur yozuvchilaridan biri – Sobir O‘nar, bugungi kun zamonaviy adabiyotimizning darg‘alaridan biri, iste’dodli adib, O‘zbekistonda xizmat ko‘rsatgan madaniyat xodimi To‘lqin Hayit, Toshkent Kimyo-texnologiya instituti kafedrasi mudiri, Filologiya fanlari bo‘yicha falsafa fanlari doktori Xursandbek To‘laboyev va boshqalar ishtirok etishdi.

Ushbu tadbirda so‘zga chiqqanlarning barchasi  Muhammad Ismoilning qalamiga mansub “Muhabbatning vatani” kitobidan o‘rin olgan she’rlar asosida o‘z fikrlarini izhor etishdi.

Kitobxonlik, she’rxonlik asosida boshlangan kitob taqdimoti xalqimizning xushovoz xonandalari, shuhrat medali sovrindori, Anvarjon Sobirov, xushovoz xonanda Nodirbek Asatullayev va Nail Baxodirov boshchiligidagi Guliston ixtisoslashtirilgan san’at maktabi orkestr jamoalarining go‘zal kuy-qo‘shiqlari bilan yanada ko‘tarinki ruhda o‘tdi deb ayta olamiz.

Taqdimot kechasiga viloyat musiqali dram teatri yosh aktyori Shuhrat Abduraxmonov boshlovchilik qildi.