Bugun, 21-yanvar kuni Oliy va o’rta maxsus ta’lim vazirining iqtisodiy masalalar bo’yicha o’rinbosari Sarvarxon Buzrukxonov Sirdaryo viloyatida joylashgan oliy ta’lim muassasalarida olib borilayotgan qurilish-ta’mirlash ishlarining holatini o’rgandi.

Vazir o’rinbosari dastlab Guliston davlat universitetida olib borilayotgan qurilish-ta’mirlash ishlari bilan tanishdi. Universitetning Jismoniy madaniyat va Agroinjeneriya fakultetlari o’quv binolarini ta’mirlash, sport majmuasida talabalar uchun kiyinish va yuvinish xonalarini qurish hamda universitet hududini obodonlashtirish ishlari boshlangan.  Qurilish ishlarini sifatli va o’z vaqtida yakunlash bo’yicha mas’ullarga tegishli tavsiyalar berildi.

Universitet mas’ullari bilan birga universitetining Yangier shahridagi Pedagogika fakulteti hududida davlat xususiy sherikchiligi asosida o’quv markazini qurish loyihasi muhokama etildi.

Shundan so’ng Sarvarxon Buzrukxonov Toshkent kimyo-texnologiya institutining Yangier filiali o’quv binosida olib borilayotgan rekonstruktsiya ishlarini ham borib ko’rdi. Hukumatning 2019 yil 9 iyuldagi 573-sonli qarori bilan tashkil etilgan mazkur filialga sobiq kollej binosi ajratilgan bo’lib, hozirda bu bino rekonstruktsiya qilinmoqda.

Vazir o’rinbosari ob’ektlardagi qurilish-ta’mirlash ishlarini o’z vaqtida sifatli yakunlash, qurilish-tiklash ishlarida mahalliy qurilish materiallaridan foydalanish va qurilish jarayonlarida jamoatchilik nazoratini o’rnatish zarurligini ta’kidladi hamda bu borada yuzaga kelishi mumkin bo’lgan masalalarni hal etishda vazirlik yordam berishga doim tayyor ekanini ma’lum qildi.

Ijtimoiy tarmoqlarda baham ko'ring