Alisher Navoiy tavalludining 580 yilligiga

Joriy yilning 27 yanvar kuni soat 17.00 da 2-talabalar turar joyida Alisher Navoiy tavalludining 580 yilligiga bag‘ishlab  “Filologiya va tillarni o‘qitish (o‘zbek tili)” ta’lim yo‘nalishi talabalari ishtirokida “El netib topqay menikim...” mavzusida adabiy-badiiy tadbir o‘tkazildi.

Tadbirni “O‘zbek adabiyotshunosli” kafedrasi mudiri O.Fayzullayeva o‘zining kirish so‘zi bilan boshladi. Keyingi so‘z navbati “O‘zbek tilshunosligi” kafedrasi mudiri J.Abdullayevga berildi. So‘zga chiqqan professor-o‘qituvchilar Alisher Navoiy ijodining o‘rganilishi, lirikasarlari, nasriy va ilmiy merosi haqida so‘z yuritishdi. Uning hayoti va ijodiy faoliyati yosh avlod tarbiyasida muhim ahamiyat kasb etishi va uzoq yillar davomida tarbiya o‘chog‘i vazifasini o‘tab kelishini alohida ta’kidladilar.

Shundan so‘ng Filologiya fakulteti 2-bosqich talabalari ishtirokidagi tadbirning badiiy qismiga o‘tildi. Talabalar tomonidan Alisher Navoiy ruboiy va tuyuqlaridan namunalar aytildi. So‘ng Alisher Navoiyning “Xamsa” dostoni tarkibiga kiruvchi “Hayratul-abror” dostonidan Ibrohim Adham to‘g‘risidagi tasavvufiy talqinga ega sahna ko‘rinishi namoyish etildi. Tadbirga Musiqa ta’limi yo‘nalishi 2-bosqich talabasi G‘aybullayev Dostonbek tomonidan Navoiy g‘azali bilan aytilgan mumtoz kuy va qo‘shiq o‘zgacha ruh va joziba bag‘ishladi.

Shundan so‘ng talabalar tomonidan Alisher Navoiy g‘azallaridan namunalar aytildi. Tadbirdagi har bir chiqishlar uning ishtirokchilarida katta taassurot qoldirdi. Tadbir so‘ngida bu jihat talabalar tomonidan alohida e‘tirof etildi.

Ijtimoiy tarmoqlarda baham ko'ring