Guliston davlat universiteti Pedagogika fakulteti “Maktabgacha ta’lim” kafedrasi hamda Yangiyer Pedagogika kolleji bilan hamkorlikda 2021-yil 1–mart kuni «Yangi O’zbekistonda maktabgacha ta’lim tizimida ta’lim sifatini yangi bosqichga ko’tarish: soha muammo va yechimlari» mavzusida seminar-trening bo‘lib o‘tdi.

Seminar – treningda Guliston davlat universitetining Pedagogika fakulteti dekani p.f.n., dotsent J.K.Komilov so‘zga chiqib so‘nggi besh yillik islohotlarning natijasida mamlakatimizda Yangi O‘zbekistonni barpo etishning zarur siyosiy-huquqiy, ijtimoiy-iqtisodiy va ilmiy-ma’rifiy asoslari yaratilganligi, keng jamoatchilik muhokamasi natijasida «Harakatlar strategiyasidan - Taraqqiyot strategiyasi sari» tamoyiliga asosan ishlab chiqilgan quyidagi ettita ustuvor yo‘nalishdan iborat 2022 — 2026 yillarga mo‘ljallangan Yangi O‘zbekistonning taraqqiyot strategiyasi va uni «Inson qadrini ulug’lash va faol mahalla yili»da amalga oshirishga oid davlat dasturining IV-bobida keltirilgan Adolatli ijtimoiy siyosat yuritish, inson kapitalini rivojlantirishga qaratilgan 38-maqsad: Maktabgacha ta’limdagi qamrov darajasini hozirgi 67 foizdan kamida 80 foizga etkazish hamda 39-maqsad: Maktabgacha ta’lim tizimida ta’lim sifatini yangi bosqichga olib chiqish, maktabgacha ta’lim-tarbiya jarayonlarini ilmiy asoslangan yondashuvlar asosida takomillashtirish haqida fikr yuritdi.

Seminar – trening davomida universitetning “Maktabgacha ta’lim” kafedrasi professor-o‘qituvchilari p.f.n., dotsent A.Bolibekovning “Maktabgacha ta’limdagi yangi islohatlar”, M.M.Fayziyevaning “Dars mashg‘ulotlarida zamonaviy pedagogik texnologiyalar va uning imkonyatlaridan foydalanish”, M.A.Raimqulovaning “Intellektual o‘yinlari va ularning yoshlar tafakkurini rivojlantirishdagi o‘rni” mavzularidagi ma’ruzalar tinglandi.

Seminar-trening universitet professor-o’qituvchilari hamda pedagogika kolleji o’quvchilari bilan ochiq-muloqot shaklida davom ettirilib, kelgusidagi rejalar haqida fikr yuritildi.