Xitoy Xalq Respublikasining Tyanszin shahrida O‘zbekiston (Sirdaryo viloyati) va Xitoy (Tyanszin shahri) o‘rtasidagi savdo-iqtisodiy hamkorlik taqdimoti bo‘lib o‘tdi. Ushbu nufuzli tadbirda Guliston davlat universiteti vakillari ham faol ishtirok etdi.

Tadbir oldidan Sirdaryo viloyati hokimi Erkinjon Turdimov hamda Xitoy delegatsiyasi rahbari — partiya qo‘mitasi kotibi Li Yunmey o‘rtasida uchrashuv tashkil etildi. Uchrashuv davomida Xitoy tomoni o‘z ta’lim muassasasining faoliyati, xalqaro hamkorlikdagi tajribasi hamda “Lu Ban ustaxonalari” loyihasi haqida batafsil ma’lumot berdi. Shu bilan birga, Guliston davlat universiteti bilan hamkorlik yo‘nalishlari va istiqboldagi rejalar muhokama qilindi.

Viloyat hokimi tomonidan mazkur tashabbuslar yuqori baholanib, Sirdaryo hududida qo‘shma loyihalarni amalga oshirish har tomonlama qo‘llab-quvvatlanishi ta’kidlandi. Uchrashuvda, shuningdek, O‘zbekistonning Xitoydagi Favqulodda va Muxtor Elchisi Farhod Arziyev hamda elchixona maslahatchisi Aziz Muysinaliyev ishtirok etdi.

Taqdimot doirasida Guliston davlat universiteti prorektori Dilmurod Eshmurodov va Xitoy kolleji vakili o‘rtasida o‘zaro anglashuv memorandumi imzolandi. Mazkur hujjat ikki tomonlama hamkorlikni quyidagi yo‘nalishlarda rivojlantirishni nazarda tutadi:
– professor-o‘qituvchilar va talabalar almashinuvi
– qo‘shma kadrlar tayyorlash
– ta’lim, fan va ishlab chiqarish integratsiyasi asosida innovatsion hamkorlik

Imzolash marosimidan so‘ng Xitoy tomoni tomonidan “xitoy tili + kasbiy ko‘nikmalar” yo‘nalishidagi o‘quv materiallari hamda ikki tilli darsliklar Guliston davlat universitetiga topshirildi. Bu esa amaliy hamkorlikni yangi bosqichga olib chiqishda muhim qadam bo‘ldi.

Tadbirdan so‘ng Guliston davlat universiteti prorektori Xitoydagi hamkor ta’lim muassasasiga tashrif buyurib, qayta tiklanuvchi energiya manbalari, aniq ishlab chiqarish va intellektual texnologiyalar yo‘nalishlaridagi ta’lim–ishlab chiqarish integratsiyasi bazalari hamda “Lu Ban ustaxonalari” faoliyati bilan yaqindan tanishdi.

O‘zbekiston tomoni ushbu ilg‘or tajribani yuqori baholab, kelgusida sifatli ta’lim resurslaridan birgalikda foydalanish, mahalliy malakali mutaxassislar tayyorlash hamda pedagoglarning amaliy ko‘nikmalarini oshirish bo‘yicha katta qiziqish bildirdi. Shuningdek, tomonlar hamkorlikni amalga oshirishning aniq mexanizmlari yuzasidan qo‘shimcha muzokaralar olib bordilar.

Mazkur memorandumning imzolanishi “Bir kamar — bir yo‘l” tashabbusi doirasida Xitoy va O‘zbekiston o‘rtasidagi professional ta’lim sohasidagi hamkorlikni yangi bosqichga olib chiqadi. Bu esa nafaqat Guliston davlat universitetining xalqaro nufuzini oshiradi, balki mintaqada zamonaviy va raqobatbardosh kadrlar tayyorlashga xizmat qiladi.

Ijtimoiy tarmoqlarda baham ko'ring