2018 yil 13 fevral kuni Guliston davlat universitetda Zahiriddin Muhammad Bobur tavvaludining 535 yilligiga bag’ishlangan “Kel, ey Bobur Vatanga, elda yoding, qadr-u shoning bor” mavzusidagi ilmiy adabiy-badiiy anjuman bo’lib o’tdi.

Anjumanda universitet rektori, professor M.T.Xodjiev, Ma’naviy-ma’rifiy ishlar bo’yicha prorektor, dotsent R.Mahmudov, Pedagogika fakulteti dekani, filologiya fanlari nomzodi, dotsent M.Mamatqulov, OAV vakillari, professor-o’qituvchilar va 534  nafar talabalar ishtirok etdi.

 Anjumanda so’zga chiqqan ma’ruzachilar Zahiriddin Muhammad Bobur o’rta asr sharq ma’daniyati, adabiyoti va she’riyatida o’ziga xos o’rin egallagan adib, shoir, olim bo’lish bilan birga yirik davlat arbobi va sarkarda bo’lganligi, Bobur keng dunyoqarashi va mukammal aql zakovati bilan Hindistonda Boburiylar sulolasiga asos solib, bu mamlakat tarixida davlat arbobi sifatida nomi qolgan bo’lsa, serimlo o’zbek tilida yozilgan “Boburnoma” asari bilan jahonning mashhur tarixnavis olimlari qatoridan ham joy olgani, uning nafis, go’zal ruboiylari turkiy she’riyatining eng nodir durdonalari bo’lib, “Mubayyin” (“Bayon etilgan”), “Xatti Boburiy”, “G’arb ishi”, Aruz haqidagi risolalari esa islom qonunshunosligi, she’riyat va til nazariyasi sohalariga munosib hissa bo’lib qo’shilganligini ta’kidlab o’tdi.   

Tadbirning badiiy qismida universitet talabalari ijrosida Bobur g’azallari bilan aytiladigan “Bahor ayyomi”, “Qaro zulfing”, “Lola”, “Soqiynomai savti kalon” qo’shiqlar, Boburning g’azallaridan namunalar va  P.Qodirovning “Yulduzli  tunlar” asaridan sahna ko’rinishlarini mahorat bilan namoyish etdi.