O‘zbekiston Respublikasi Prezidenti Shavkat Miromonovich Mirziyoyev tomonidan 13-aprel kuni o‘tkazilgan “Yoshlarga oid davlat siyosati samaradorligini yanada oshirish va yoshlar bilan ishlashda yangicha tizim yaratishga bag‘ishlangan” videoselektorda Oliy ta’lim muassasalari o‘zlariga yaqin hududlardagi mahallalarga yoshlar ma’naviyatini yuksaltirish hamda ularning bo‘sh vaqtlarini mazmunli o‘tkazishlariga ko‘maklashish maqsadida biriktirilishi belgilab berilgan.

       Ushbu topshiriq ijrosini ta’minlash maqsadida Guliston davlat universitetiga Guliston shahridagi 10 ta mahalla biriktirilgan. Ushbu mahallalarda yoshlar ma’naviyatini yuksaltirish va ularning bo‘sh vaqtini mazmunli tashkil etish yuzasidan ilgari surilgan “Besh muhim tashabbus” doirasida turli xil to‘garaklar faoliyati yo‘lga qo‘yildi. Ushbu to‘garaklarni vaqtincha band bo‘lmagan yoshlar o‘rtasida keng targ‘ib etish va yoshlarni Universitet bilan yaqindan tanishtirish maqsadida “Yoshlar forumi” tashkil etildi.

       Mazkur Forum doirasida yoshlar o‘zlarining qiziqishlari bo‘yicha tashkil etilgan to‘garaklarda universitetning tajribali professor-o‘qituvchilari tomonidan sohaga oid bilim va ko‘nikmalarga ega bo‘lishmoqda.

       “Yoshlar forumi”da universitet raktori M.Xodjiyev nutq so‘zlab, yoshlarni yanada faol bo‘lishga, yaratilayotgan sharoitlardan unumli foydalanishga chaqirdi. Forumda Guliston shahar hokimligi vakillari va universitet professori R.Mahmudovlar nutq so‘zlashdi.

       Forum yakunida San’atshunoslik fakulteti ijodkorlari tomonidan kontsert dasturi namoyish etildi.