2021-yilning 20-avgust kuni Yangi O’zbekiston tarixida yangi sahifa yaratildi. Shu kuni O‘zbekiston Respublikasi Prezidenti Shavkat Mirziyoyev mamlakatimiz tadbirkorlari bilan ochiq muloqot o‘tkazdi. Bunday shakldagi uchrashuv ilk bor o‘tkazildi va unda jami o‘n mingga yaqin tadbirkor ishtirok etdi.

         Bu tarixiy uchrashuv haqida davlatimiz rahbari quyidagicha fikr bildirdilar: “Bugun ilk bor mutlaqo yangicha formatda – ochiq muloqot shaklida sizlar bilan yuzma-yuz uchrashib, biznes sohasidagi muammo va masalalar haqida batafsil gaplashib olishga qaror qildik.”

         Bunday oliy darajadagi uchrashuv nima sababdan tashkil etildi, bunga qanday zarurat va ehtiyoj bor ediki, shaxsan davlat rahbari ishtirokida tadbirkorlar, kichik biznes va xususiy tadbirkorlik vakillari bilan uchrashib, sohaga oid masalalar yuzasidan bu kabi muloqot tashkil etildi? Sir emaski, 2020-yilning dastlabki kunlarida Xitoyda qayd etilgan Koronavirus infektsiyasi butun dunyoda pandemiya darajasiga chiqib, deyarli barcha davlatlarning nafaqat ijtimoiy, balki iqtisodiy taraqqiyotiga ham katta zarba berdi. Barcha xalqaro moliya institutlari bu haqda bir yildan beri jar solmoqda. Bir qator yetakchi davlatlar o‘z iqtisodiyotlarini ushlab qolishga qaratilgan chora-tadbirlarni amalga oshirib turgan bir paytda O‘zbekistonda iqtisodiyotni yanada barqarorlashtirish va iqtisodiy samaradorlikni oshirishga erishilayotgani tarixiy haqiqatdir.

         Bunday natijalarga erishish esa o‘z-o‘zidan bo‘lmaydi. Bugun kichik biznes va xususiy tadbirkorlik mamlakatimiz iqtisodiyotining ustuvor yo‘nalishi etib belgilangan. So‘nggi besh yilda bu sohani rivojlantirishga qaratilgan 2 mingga yaqin Qonun, Farmon va Qarorlar qabul qilindi. Ularga asosan, 114 ta litsenziya va ruxsatnoma bekor qilindi, 33 ta faoliyat turi xabardor qilish tartibiga o‘tkazildi. Ruxsatnomalarni rasmiylashtirish tartiblari soddalashtirilib, muddatlari o‘rtacha 2 baravarga qisqartirildi. Ortiqcha tekshirishlar, naqd pul, valyuta va xomashyo bo‘yicha ko‘plab cheklovlarga barham berildi. Bunday qulaylik va imkoniyatlar natijasida yangi subektlar keskin ko‘payib, avvaldan ishlayotganlari faoliyatini kengaytirmoqda. Oxirgi besh yilda tadbirkorlar soni qariyb 3 baravar oshdi. Ko‘p ishbilarmonlar o‘z biznesini butun mamlakat miqyosida kengaytirib, minglab ish o‘rinlari yaratib, nufuzli yirik kompaniyalarga aylandi. Ichki va tashqi bozorda o‘z nufuzi va brendiga ega tadbirkorlar sinfi shakllana boshladi. Davlatimiz rahbari ana shunday azmu shijoatli va fidoyi tadbirkorlarning ayrimlarini tilga olib, xalqimizga madadkor bo‘layotgani uchun ularga minnatdorchilik bildirdi.

Ma’lumki, mazkur ochiq muloqot oldidan tadbirkorlarni qiynayotgan muammolar so‘ralgan edi. Turli masalalarga oid 15 mingdan ortiq murojaatlar bo‘ldi. Prezidentimiz o‘z nutqida ularni hal qilishga qaratilgan 7 ta muhim yo‘nalishni ko‘rsatib o‘tdi. Birinchi yo‘nalish – biznesni moliyalashtirish, ikkinchisi – soliq tizimini takomillashtirish va biznesga soliq yukini kamaytirish, uchinchisi – yer ajratish, to‘rtinchisi – infratuzilma, beshinchisi – eksportyor korxonalarni qo‘llab-quvvatlash, oltinchisi – transport-logistika, yettinchisi – sohadagi tartib-taomillarni soddalashtirish masalalariga qaratildi.

Davlatimiz rahbari har bir yo‘nalish bo‘yicha dolzarb vazifalarni ko‘rsatib, yangi tashabbuslarni ilgari surdi.

Muloqotda tadbirkorlar so‘zga chiqib, faoliyatida duch kelayotgan muammolarni, taklif va mulohazalarini aytdi. Ular tarmoq mutasaddilari va hokimlar ishtirokida muhokama qilindi.

Prezidentimiz bunday ochiq muloqotni an’anaga aylantirib, har yili tashkil etish, 20 avgustni  mamlakatimizda “Tadbirkorlar kuni” deb e’lon qilish taklifini bildirdi. Bu takliflar keng qo‘llab-quvvatlandi.

Muxsin Tadjiyevich Xodjiyev

Guliston davlat universiteti rektori, texnika fanlari doktori, professor,

Xalq deputatlari Sirdaryo viloyat Kengashi deputati

Ijtimoiy tarmoqlarda baham ko'ring