O‘zbekiston Respublikasi Prezidenti raisligida kambag‘allikni qisqartirish, aholi bandligini ta’minlash, aholi daromadlarini oshirish hamda yoshlarni kasb-hunarga yo‘naltirish borasida belgilangan vazifalar ijrosini ta’minlash maqsadida Guliston davlat universiteti To‘qimachilik va yengil sanoat texnologiyasi kafedrasi qoshida “Tikuvchilikka asoslangan Mohir qo‘llar kasbga o‘qitish markazi” faoliyati yo‘lga qo‘yilgan.

Mazkur kasbga o‘qitish markazining asosiy maqsadi kam ta’minlangan oilalar a’zolari, ishsiz yoshlar va kasb egallash istagida bo‘lgan fuqarolarni tikuvchilik sohasi bo‘yicha kasbiy bilim, amaliy ko‘nikma va malakalar bilan qurollantirish, ularning ijodiy qobiliyatlarini rivojlantirish hamda kelgusida mustaqil mehnat faoliyati, tadbirkorlik va o‘zini o‘zi band qilishlari uchun zarur shart-sharoitlar yaratishdan iborat.

Markaz faoliyati zamonaviy tikuvchilik texnologiyalari, milliy hunarmandchilik an’analari, kiyim konstruksiyasini ishlab chiqish, modellashtirish va dizayn yo‘nalishlarini o‘zaro uyg‘unlashtirgan holda tashkil etilgan. O‘quv mashg‘ulotlari nazariy bilimlarni amaliy faoliyat bilan mustahkamlash, tinglovchilarda kasbiy kompetensiyalarni shakllantirish va mehnat bozorida talab yuqori bo‘lgan ko‘nikmalarni rivojlantirishga yo‘naltirilgan.

Hozirgi kunda “Tikuvchilikka asoslangan Mohir qo‘llar kasbga o‘qitish markazi”da tinglovchilarga tikuvchilik sohasining nazariy asoslari va amaliy jihatlari bo‘yicha ta’lim berilmoqda. Mashg‘ulotlar davomida libos eskizlarini chizish, tikuv mashinalarida ishlash, matolarni tanlash va bichishga tayyorlash, o‘lcham olish va andazalar tayyorlash, kiyim detallarini bichish, tikish, detallarga ishlov berish, kiyim qismlarini biriktirish, yakuniy pardozlash hamda tayyor mahsulot sifatini nazorat qilish bo‘yicha bilim va ko‘nikmalar shakllantirilmoqda.

O‘quv jarayonida tinglovchilarning amaliy mahoratini rivojlantirishga alohida e’tibor qaratilib, turli xil kiyim va tikuv buyumlarini tayyorlash, milliy kiyimlar elementlarini tikish, zamonaviy kiyim modellarini ishlab chiqish, kiyimlarga bezak berish hamda individual buyurtmalar asosida mahsulot tayyorlash bo‘yicha amaliy ishlar olib borilmoqda.

Shuningdek, tinglovchilarga tikuvchilik mahsulotlarining sifat ko‘rsatkichlarini baholash, mahsulot tannarxini hisoblash, materiallardan tejamkor foydalanish, tayyor mahsulotlarni realizatsiya qilish, mijozlar bilan ishlash, kichik tikuvchilik biznesini tashkil etish va tadbirkorlik faoliyatini yo‘lga qo‘yish bo‘yicha tushunchalar berilmoqda.

Markazda o‘quv mashg‘ulotlarini tashkil etishda kafedraning ilmiy-pedagogik salohiyati, professor-o‘qituvchilar va amaliy tajribaga ega mutaxassislarning bilim hamda ko‘nikmalaridan samarali foydalanish ko‘zda tutilgan. Mashg‘ulotlar amaliy yo‘naltirilgan, individual yondashuvga asoslangan hamda tinglovchilarning kasbiy qiziqishlari va imkoniyatlarini hisobga olgan holda olib boriladi.

Kasbga o‘qitish markazi faoliyati natijasida quyidagi vazifalarni amalga oshirish ko‘zda tutilgan:

1. Kam ta’minlangan oilalar a’zolari va ishsiz yoshlarning tikuvchilik sohasi bo‘yicha kasbiy bilim va amaliy ko‘nikmalarini rivojlantirish.
2. Yoshlarni tikuvchilik, milliy hunarmandchilik va zamonaviy kiyim ishlab chiqarish sohalariga keng jalb etish.
3. Tinglovchilarda mustaqil ravishda kiyim va tikuv buyumlarini tayyorlash, tikuv mashinalarida ishlash hamda texnologik jarayonlarni bajarish malakasini shakllantirish.
4. Tinglovchilarning ijodiy qobiliyatlari, estetik dunyoqarashi, konstruktiv fikrlashi va dizaynerlik ko‘nikmalarini rivojlantirish.
5. Tikuvchilik mahsulotlarini tayyorlash, ularning sifatini baholash, tannarxini hisoblash va mahsulotlarni realizatsiya qilish bo‘yicha kompetensiyalarni shakllantirish.
6. Kurs bitiruvchilarini mustaqil mehnat faoliyati, o‘zini o‘zi band qilish, kichik biznes va tadbirkorlik faoliyatiga yo‘naltirish.
7. Milliy kiyimlar va tikuvchilik an’analarini rivojlantirish, zamonaviy texnologiyalar bilan uyg‘unlashtirish hamda yosh avlodga yetkazish.
8. Universitetning ijtimoiy mas’uliyatini oshirish, hududda aholi bandligini ta’minlash va kambag‘allikni qisqartirishga munosib hissa qo‘shish.

Xulosa qilib aytganda, “Tikuvchilikka asoslangan Mohir qo‘llar kasbga o‘qitish markazi” faoliyati nafaqat tinglovchilarga kasb o‘rgatish, balki ularning iqtisodiy mustaqilligini ta’minlash, ijtimoiy faolligini oshirish, ijodiy salohiyatini ro‘yobga chiqarish va kelajakda daromad manbaiga ega bo‘lishlariga ko‘maklashishga xizmat qiladi. Mazkur markaz universitet, hududiy tashkilotlar va aholi o‘rtasidagi hamkorlikni mustahkamlash, kasbiy ta’lim imkoniyatlarini kengaytirish hamda tikuvchilik sohasida malakali kadrlar tayyorlashning muhim amaliy platformasi hisoblanadi.

Ijtimoiy tarmoqlarda baham ko'ring