O‘zbekiston Respublikasi Prezidenti Shavkat Mirziyoyev raisligida 2026-yil 3-sentabr kuni “Kambag‘allikni qisqartirish va aholi daromadlarini oshirish bo‘yicha ishlarni yangi bosqichga olib chiqish masalalari” yuzasidan o‘tkazilgan videoselektor yig‘ilishida belgilangan vazifalar ijrosini ta’minlash, aholi bandligini oshirish, kam ta’minlangan oilalar a’zolari va ishsiz yoshlarni kasb-hunarga o‘rgatish maqsadida Guliston davlat universiteti Tabiiy fanlar fakulteti Agrotuproqshunoslik va melioratsiya kafedrasi qoshida “Gulchilik, limonchilik va dorivor o‘simliklar” zamonaviy kasbga o‘rgatish markazi faoliyati yo‘lga qo‘yilgan.

Mazkur markazning asosiy maqsadi kam ta’minlangan oilalar a’zolari va ishsiz yoshlarni gulchilik, limonchilik hamda dorivor o‘simliklarni yetishtirish yo‘nalishlari bo‘yicha kasbiy bilim va amaliy ko‘nikmalarga o‘rgatish, ularda zamonaviy agrotexnologiyalarni qo‘llash malakasini shakllantirish hamda kelgusida mustaqil mehnat faoliyati yoki tadbirkorlik bilan shug‘ullanishlari uchun zarur bilim va ko‘nikmalar berishdan iborat.

Hozirgi kunda markazda jami 9 nafar tinglovchi tahsil olmoqda. Mashg‘ulotlar davomida tinglovchilarga gulchilik, limonchilik va dorivor o‘simliklarni yetishtirishning nazariy asoslari, ekish va ko‘paytirish usullari, ko‘chat tayyorlash, tuproqni tayyorlash, sug‘orish, oziqlantirish, o‘simliklarni parvarishlash hamda kasallik va zararkunandalardan himoya qilish bo‘yicha bilim va ko‘nikmalar berilmoqda.

Gulchilik yo‘nalishida manzarali va xona gullarini ko‘paytirish, ko‘chat yetishtirish, tuvak va gulzorlarni tashkil etish, o‘simliklarni mavsumiy parvarishlash hamda landshaft va bezak kompozitsiyalarini yaratish bo‘yicha amaliy mashg‘ulotlar olib boriladi.

Limonchilik yo‘nalishida limon ko‘chatlarini tayyorlash va parvarishlash, payvandlash, issiqxona sharoitida yetishtirish, sug‘orish va oziqlantirish tartibi, mikroiqlimni boshqarish hamda hosilni yig‘ish va saqlash bo‘yicha nazariy va amaliy bilimlar shakllantiriladi.

Dorivor o‘simliklar yo‘nalishida yalpiz, melissa, moychechak, rayhon va boshqa dorivor hamda xushbo‘y o‘simliklarni ekish, ko‘paytirish, parvarishlash, hosilini yig‘ish, quritish va saqlash usullari o‘rgatiladi.

O‘quv mashg‘ulotlari jarayonida tinglovchilarning amaliy mahoratini rivojlantirishga alohida e’tibor qaratiladi. Jumladan, urug‘ va ko‘chatlarni tayyorlash, ekish, ko‘chirib o‘tqazish, payvandlash, o‘simliklarni parvarishlash, o‘g‘itlash, sug‘orish hamda yetishtirilgan mahsulotni saralash va saqlash bo‘yicha amaliy ishlar bajariladi. Shuningdek, mahsulot tannarxini hisoblash, bozor talabini o‘rganish, mahsulotni qadoqlash va sotish, kichik biznes faoliyatini yo‘lga qo‘yish imkoniyatlari haqida tushunchalar beriladi.

Kurs faoliyati natijasida quyidagi vazifalarni amalga oshirish ko‘zda tutilgan:

1. Kam ta’minlangan oilalar a’zolari va ishsiz yoshlarning kasbiy bilim hamda amaliy ko‘nikmalarini rivojlantirish.

2. Yoshlarni gulchilik, limonchilik va dorivor o‘simliklarni yetishtirish sohalariga keng jalb etish.

3. Tinglovchilarda gul, limon ko‘chatlari va dorivor o‘simliklarni mustaqil yetishtirish malakasini shakllantirish.

4. Zamonaviy agrotexnologiyalar, tejamkor sug‘orish va o‘simliklarni samarali parvarishlash usullarini o‘rgatish.

5. Kurs bitiruvchilarini o‘z tomorqasi, issiqxonasi yoki kichik biznesi asosida daromad topishga yo‘naltirish.

6. Gulchilik, limonchilik va dorivor o‘simliklar yetishtirishni rivojlantirish, ekologik madaniyat va tadbirkorlik ko‘nikmalarini shakllantirish.

Ijtimoiy tarmoqlarda baham ko'ring